Día Internacional das ALTAS CAPACIDADES

Hoxe, 14 de marzo, queremos concienciar sobre este Día Internacional das Altas Capacidades. Salientamos que son unha forma diferente de percibir o mundo, de pensar, de facer preguntas, de sentir intensamente, de vivir a outro nivel. Detrás de cada etiqueta hai unha persoa que precisa recoñecemento, apoio e oportunidades para desenvolverse plenamente. É o xusto.

Hoxe alzamos as nosas voces para concienciar, para romper estereotipos e para disipar mitos que durante demasiado tempo eclipsaron as necesidades intelectuais e emocionais dos nosos peques.

Necesitamos esixir a resposta educativa que merecen, para que sexa posible construír unha escola onde cada rapaz ou rapaza poida ser quen é, sen ter que enmascararse, sen ocultar a súa forma de pensar, aprender ou sentir. Hoxe tentamos defender que sexan vistos e mirados coa comprensión, empatía e afecto que todos desexamos para o que máis nos importa: os nosos fillos e fillas.

Neste día conmemorativo, pedimos que todo o mundo comprenda que falar de xente con alta capacidade non se trata só de persoas con talento; tamén vai de diversidade e futuro. Agardamos que, como sociedade, pronto poidamos ter unha perspectiva máis diversa, que nos permita facer deste mundo un lugar mellor, mentres continuamos a dar pasos xuntos na direción correcta.